 |
Kamran Sreemon |
ഒരു ചെറുപ്പക്കാരന്‍!! ഒരു കൗതുകത്തിന് തുടങ്ങിയ ഇത് പിന്നീട് തന്‍റെ പല ഹോബികളില്‍ ഒന്നാക്കിയപ്പോള്‍ കാഴ്ചക്കാര്‍ക്ക് അതൊരു കൗതുകമായി മാറി. തന്‍റെ അംഗ വൈകല്യത്തെ മറി കടന്നു കൊണ്ടുള്ള പ്രവര്‍ത്തന ഫലമാണിതെന്നറിയുമ്പോള്‍ കൗതുകത്തിന്‍റെ മാറ്റ് കൂടുന്നു. കാല്‍ നൂറ്റാണ്ടോളമായി പാലത്തിങ്ങല്‍ പ്രദേശത്ത് പ്രവര്‍ത്തിച്ചു വരുന്ന 'മീഡിയ ലൈബ്രറി'യുടെ അമരത്തുള്ള സമീര്‍ മുക്കത്ത് എന്ന ഈ ചെറുപ്പക്കാരന്‍ ലൈബ്രറി രംഗത്ത് ശ്രദ്ധേയനാവുമ്പോള്‍ തന്നെ വ്യത്യസ്തങ്ങളായ ഹോബികളിലൂടെയും ജന ശ്രദ്ധയാകര്‍ഷിക്കുകയാണ്. വളരെ ഭൃഹത്തായ ഈ പേന കളക്ഷനു പുറമെ, ബോണ്‍സായി കളക്ഷന്‍, സ്റ്റാമ്പ് കളക്ഷന്‍, കറന്‍സി-കോയിന്‍ കളക്ഷന്‍ എന്നിവയ്ക്ക് പുറമെ കഥ കവിത, നിരൂപണങ്ങള്‍ എന്നിവയിലും സാന്നിധ്യമറിയിച്ചിട്ടുണ്ട് സമീര്‍. പുസ്തകങ്ങളുടെ കൂട്ടുകാരനായ സമീര്‍ പേനകളുടെ സ്വന്തക്കാരനാണ്. ഇന്ന് പതിനായിരം കവിഞ്ഞു നില്‍ക്കുന്ന സമീറിന്‍റെ ശേഖരത്തിലെ,പേനകള്‍ക്ക് മിക്കതിനുംഓരോ കഥ പറയാനുണ്ട്. ഒളിമങ്ങാതെ ഓര്‍മ്മയില്‍ തങ്ങി നില്‍ക്കുന്ന ഒരോ ചരിതങ്ങള്‍. ശേഖരത്തിലേക്ക് ആദ്യം വന്ന പേനകള്‍ക്ക് സ്കൂള്‍ ബാല്യത്തിന്‍റെ മധുര സ്മരണകളാണ്. പ്രഗല്‍ഭരുടെ പേനകള്‍, പലതരം കരാറുകളില്‍ ഒപ്പു വെച്ചവ, വിവിധ പ്രസ്താവനകള്‍ക്ക്, നയങ്ങള്‍ക്ക് രൂപം നല്‍കിയവ, ആശയങ്ങള്‍ രേഖപ്പെടുത്തിയവ, ഓര്‍മ്മക്കുറിപ്പുകള്‍, കഥകള്‍, കവിതകള്‍ നെയ്തെടുത്തവ, വിവിധ പരിക്ഷകളില്‍ പങ്കെടുത്തവ.. എ.പി.ജെ അബ്ദുള്‍ കലാം, പാണക്കാട് മുഹമ്മദലി ശിഹാബ് തങ്ങള്‍, ഇ.അഹമ്മദ്, പികെ അബ്ദുറബ്, ഡോ.എംകെ മുനീര്‍, എംഎ ബേബി, കമലാ സുരയ്യ, സി. രാധാകൃഷ്ണന്‍, ഒ വി വിജയന്‍, സാറാ ജോസബ്, എം ഗംഗാധരന്‍, രാവണ പ്രഭു, റഷീദ് പരപ്പനങ്ങാടി തുടങ്ങി.. ഐപിഎസ് ഐഎഎസ് ഉദ്യോഗസ്ഥരും വിവിധ മേഖലകളിലുള്ള മറ്റു ഉദ്യോഗസ്ഥരുടെ വരെ സമ്മാനങ്ങളുണ്ട് സമീറിന്‍റെ പേന ശേഖരത്തില്‍!! കൂടാതെ പാര്‍കര്‍, ഹീറോ പോലുള്ള പ്രസിദ്ധ കമ്പനികളുടെ ലിമിറ്റഡ് എഡിഷന്‍ പേനകളും, മാരുതി പാലുള്ള കമ്പനികളുടെ സ്പെഷ്യല്‍ എഡീഷന്‍ പേനകളും ശേഖരത്തിലുണ്ട്‌. ഇതിനോടകം തന്നെ ഒട്ടനവധി സംഘടനകള്‍, ക്ലബ്ബുള്‍, സ്കൂളുകള്‍, കോളെജുകള്‍ അവരുടെ ആഘോഷങ്ങളില്‍ സമീറിന്‍റെ ഈ ശേഖരം ഒരു ഇനമാക്കി പ്രദര്‍ശിപ്പിച്ചിട്ടുണ്ട്. മിക്കവരും പ്രദര്‍ശനം കഴിഞ്ഞ് പേനകള്‍ തിരിച്ചേല്‍പ്പക്കുമ്പോള്‍ എണ്ണം കുറഞ്ഞു പോകാറുണ്ട് എന്ന് വിഷമത്തോടെ പറഞ്ഞ സമീറിനോട്, എന്നിട്ട് താങ്കളെന്ത് കൊണ്ട് അവരോടത് ചോദിക്കുന്നില്ല എന്ന് ചോദിച്ചപ്പോ ''എന്നെ പ്രോല്‍സാഹിപ്പിക്കുവാന്‍ വേണ്ടി അവസരമൊരുക്കി ത്തരുന്ന അവരോട് ഞാനെങ്ങനെ പറയും'' എന്നാണ് സമീര്‍ തിരിച്ചു ചോദിച്ചത്. ഒരു വലിയ ഡയറി നിറയെ വിവിധ മേഖലകളില്‍പ്പെട്ട പ്രസിദ്ധരായ വ്യക്തികളില്‍ നിന്നും ഓട്ടോഗ്രാഫ് ഒപ്പിടിവിച്ച് സൂക്ഷിക്കുന്ന സമീര്‍ അവരുടെയെല്ലാം അംഗീകാരവും ആശീര്‍വാദവുമാണത് എന്ന് വിശ്വസിക്കുന്നു!! വ്യത്യസ്തതയിലൂടെ വ്യക്തിമുദ്ര പതിപ്പിച്ച സമീറിന് ചിറക് മുളച്ച് തുടങ്ങിയ ഒരുപാട് ആശയങ്ങളും ഒരുപിടി സ്വപ്നങ്ങളുമുണ്ട്. നമ്മുടെ ആശീര്‍വാദമാണ് ഈ ചെറുപ്പക്കാരന്‍ കാംക്ഷിക്കുന്നത്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ