Mubashir Sangam |
ഇവിടെ അത് പോസ്റ്റും എന്ന് പ്രതീക്ഷിക്കുന്നു . എനിക്ക് അറിയാവുന്ന എന്റെ ഓര്മകളുടെ ഓളങ്ങളില് ഒഴുകുന്ന കുറച്ചു കാര്യങ്ങള് മാത്രം പറയാന് ഉദ്ദേശിക്കുന്നു ആര്ക്കും വിരോധം ഉണ്ടാകാന് സാധ്യത ഇല്ല എന്ന് കരുതുന്നു .
എന്റെ ജനനശേഷം(1994)അതിനു ശേഷമുള്ള കാര്യങ്ങള് മാത്രമെ ഞാന് പറയുന്നുള്ളൂ .ആദ്യ കാലത്ത് പാലത്തിങ്ങലിന്റെ തിരുനെറ്റിയില് (ഇന്നത്തെ ലീഗ് ഓഫീസ് പരിസരം ) സ്വകാര്യ വ്യക്തികളുടെ സ്ഥലത്ത് സ്ഥലത്ത് സ്ഥിതിചെയ്തിരുന്ന സ്കൂള് 1994 വെള്ളപൊക്കത്തിനു ശേഷം തകര്ച്ചയുടെ വക്കില് എത്തിയതിനു ശേഷമാണ് ഇന്ന് കാണുന്ന സ്ഥലത്തേക്ക് വിശാലമായ സ്കൂള് മാറ്റിസ്ഥാപിച്ചത് . ഇതിനു പിന്നില് ഒരുപാട് നമ്മള്ക്ക് അറിയാത്തവരുടെ കഠിനപ്രയത്നവും വിയര്പ്പുതുള്ളികളും പതിഞ്ഞിട്ടുണ്ട്
2000 - ത്തില് എന്റെ ആറാം വയസ്സില് ഒരു തണുപ്പുള്ള ജൂണ് മാസത്തില് പുതുകുടയും സ്ലൈറ്റും കയ്യില് പിടിച്ചു എന്റെ സഹോദരന്റെ കൂടെ ആദ്യമായി ഞാനി വൈജ്ഞാനിക സമുച്ചയത്തിന്റെ ചവിട്ടു പടികള് കയറിയിറങ്ങി . കോണിപ്പടിക്ക് അടുത്തുള്ള അന്നത്തെ 1 B ക്ലാസ്സില് രണ്ടാം ബെഞ്ചില് ചെന്നിരുന്നു ചുറ്റ്പാടും കണ്ണോടിച്ചപ്പോള് അനവധി പുതിയമുഖങ്ങള് . എല്ലാവരുടെ മുഖത്തും ആകാംഷയും അതിലുപരി നിരാശയും തളം കെട്ടിനില്ക്കുന്നു . അലങ്കോല ശബ്ധങ്ങളാല് സ്കൂള് ആകെ ആടിതിമിര്ക്കുന്നു . അങ്ങനെ വിഷാദ മുഖവുമായി ഇരിക്കുമ്പോയാണ് കയ്യില് ഒരു കഷ്ണം ചോക്കും നെറ്റിയില് സിന്ദൂരവും കാര്കൂന്തളില് തുളസികതിരും ചൂടി ഒരു ദേവതയെ പോലെ ഒരാള് അവിടേക്ക് കടന്നുവന്നു
ജീവിതത്തില് ആദ്യമായി അക്ഷരങ്ങളെ എനിക്ക് കളിക്കൂട്ടുകാരാക്കി തന്ന എന്റെ ആദ്യ ഗുരു എന്റെ പ്രിയ അംബിക ടീച്ചര് ഇന്നു എവിടെ ആണന്നു അറിയില്ല എന്നാലും ഓര്ക്കാറുണ്ട് അന്ന് ടീച്ചര് താമസിച്ചിരുന്നത് വാദിരഹമയിലെ പള്ളിയോടു കൂടെ ഉള്ള കോട്ടെയ്സിലെ അവസാന റൂമില് ആയിരുന്നു . എല്ലാവരെയും പോലെ ബാല്യത്തിന്റെ ചാപല്യത്തില് അക്ഷരങ്ങള് എന്താണന്നു പഠിക്കാന് ഞാനും എന്നെ പഠിപ്പിക്കാന് എന്റെ പ്രിയ ഗുരുക്കന്മാരും ഒരുപാട് ബുദ്ധിമുട്ടി .
എനിക്ക് താല്പര്യം ബാപ്പു കാക്കയുടെയും സൈതലവി ബാപ്പുന്റെയും കടയിലെ ഉറഐസും നാരങ്ങാമുട്ടായിയും പുളിഅച്ചാറും തിന്നാനും സ്കൂളിനു അടുത്തുള മാവില് കല്ലെറിയാനും കുന്നുമ്മല് അയമുട്ടി ഹാജിയുടെ തൊടുവിലെ പേരക്ക മരങ്ങളില് കയറാനും ഒക്കെ ആയിരുന്നു . പിന്നെ സൈദലവി ബാപ്പുവും അദ്ദേഹത്തിന്റെ പത്നി ബിയ്യാത്തു താത്തയും ഉണ്ടാക്കുന്ന ചെറുപയര്കറിയും വേവ്കൂടിയ ചോറിന്റെയും രുചി ഇന്നും നാവിന്തുമ്പില് ഉണ്ട് . അന്ന് സ്കൂളിന്റെ താഴെ നിലയിലെ പകുതി ഹാള് ഭക്ഷണം കഴിക്കാനും അത് കഴിഞ്ഞാല് കളിക്കാനും ഉപയോകിച്ചിരുന്നു
നാലു വര്ഷങ്ങള് മാസങ്ങള്പോലെ കടന്നുപോയപ്പോള് ആ കാലയളവില് അനവധി അധ്യാപകരുടെ നല്ല വാക്കിനും അതില് കൂടുതല് ചീത്ത വാക്കിനും ഞാനും കൂട്ടുകാരും അര്ഹരായി . നാലാം ക്ലാസ്സില് നിന്നും എല്.എസ് .എസ് നേടിയപ്പോള് മാത്രമാണ് ചിലര്ക്ക് അന്നുവരെയുള്ള അവരുടെ ഊഹങ്ങള് തെറ്റാണു എന്ന് മനസ്സിലയിരിക്കുക . ഈ കാലയളവില് മുന്ഷിമാഷ് , പുരുഷോത്തമന്മാഷ് , അംബിക ടീച്ചര് ജയശ്രീ ടീച്ചര് , ശ്യാമള ടീച്ചര് , മിനി ടീച്ചര്, എന്നിവരുടെ ശിക്ഷണത്തില് വിദ്യ അഭ്യസിക്കാന് എനിക്ക് ഭാഗ്യം സിദ്ധിച്ചു . അവിടെ നിന്നും പോന്നങ്കിലും ഇപ്പോയും സ്കൂളില് നടക്കുന്ന ഒരു പരിപാടിയും കഴിയുന്നതും മിസ്സ് ചെയ്യാറില്ല
ഈ സ്കൂളിന്റെ കാര്യത്തില് നാട്ടുകാര്ക്ക് ഒരു ദിവാസ്വപ്നം ഉണ്ട് വിശാലമായ കെട്ടിടത്തില് പ്രവര്ത്തിക്കുന്ന ഈ LP സ്കൂള് ഒരു UP സ്കൂള് ആയി അപ്ഗ്രേഡ് ചെയ്യുക എന്നതാണ് . പരപ്പനങ്ങാടി പഞ്ചായത്തിലെ അല്ലെങ്കില് തിരുരങ്ങാടി നിയോജകമണ്ഡലത്തിലെ തന്നെ ഏറ്റവും വലിയ കെട്ടിടത്തില് വിശാല സൗകര്യത്തോടെ പ്രവര്ത്തിക്കുന്ന ഏറ്റവും വലിയ LP സ്കൂള് നമ്മുടെതാണ് . ഈ അടുത്തായി നമ്മുടെ നിയോജകമണ്ഡലത്തിലെ നെടുവ സ്കൂളും തൃക്കുളം സ്കൂളും ഹൈസ്കൂള് ആക്കി മാറ്റിയ നമ്മുടെ സ്ഥലം MLA കൂടിയായ വിദ്യാഭ്യാസ മന്ത്രിയുടെ അബ്ദുറബ്ബ് സാഹിബിന്റെപ്രവര്ത്തനം സ്വാഗതാര്ഗം തന്നെയാണ്
ഈ സര്ക്കാരിന്റെ കാലത്ത് തന്നെ ഇത് നടന്നില്ലങ്കില് പിന്നെ കുറെ കാലത്തേക്ക് പ്രതീക്ഷിക്കണ്ട
നാട്ടുകാരുടെ ഒരുപാട് കാലത്തെ ഒരു അപേക്ഷയാണ് ഇത് ഇനിയെങ്കിലും പരിഗണിക്കണം ഞങ്ങളുടെ മക്കളും സഹോദരങ്ങളും അനുഭവിക്കുന്ന ഒരുപാട് പ്രയാസങ്ങള്ക്കും ബുദ്ധിമുട്ടുകള്ക്കും ഒരു അറുതി വരുത്താന് അതിനു സാധിക്കും . താങ്കള് അതിനു ശ്രമിക്കും എന്ന് തന്നെയാണ് വോട്ടു തന്നു മന്ത്രിസഭയിലേക്ക് പറഞ്ഞയച്ച നാട്ടുകാരുടെ പ്രതീക്ഷ
സാമുഹിക പ്രതിബദ്ധതയോടെ
Click here for facebook Link
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ